Presidenti Meta shtron iftar për Ramazan

Presidenti i Shqipërisë, Ilir Meta, ka shtruar mbrëmë iftar në Pallatin e Brigadave, në të cilin ishin të ftuar kreu i Bashkësisë Myslimane Shqiptare, Haxhi Skënder Bruçaj, udhëheqës fetarë dhe shpirtërorë të bashkësive shqiptare, ambasadorë dhe përfaqësues diplomatikë, teologë dhe personalitete të ndryshme.

Meta i uroi të gjithë besimtarët myslimanë shqiptarë për një agjërim të mbarë. Presidenti vlerësoi sakrificën e besimtarëve në përkushtimin ndaj Zotit dhe vlerave humane, përcjell albinfo.ch.

“Ramazani është muaji i mirëkuptimit, paqes dhe i mëshirës hyjnore. Është muaji ku dalin në pah cilësitë më të mira njerëzore, si bujaria, toleranca, durimi, shpirtmirësia, si dhe respekti e dashuria për njëri-tjetrin. Ramazani përcjell përherë mesazhe ngrohtësie për besimtarët dhe i fton ata për më shumë dhembshuri dhe bujari, sidomos për të varfrit, familjet në nevojë, jetimët, të moshuarit dhe të vetmuarit. Uroj që mesazhet e solidaritetit nga ky muaj i shenjtë të vazhdojnë edhe më tej të plotësojnë kërkesat e qytetarëve tanë për më shumë mundësi, paqe, solidaritet dhe drejtësi sociale”, ka thënë presidenti Meta.