Presidenti Thaçi dekreton 53 gjyqtarë të rinj

Gjyqtarët e rinj e kanë bërë betimin dhe janë zotuar që do t’i qëndrojnë besnikë Kushtetutës së  Republikës së Kosovës

Presidenti i Kosovës, Hashim Thaçi, të hënën me një ceremoni të veçantë dekretoi emërimin e 53 gjyqtarëve të rinj.

Në fjalën e tij, presidenti Thaçi tha se Republika e Kosovës përgjatë viteve të fundit ka bërë dhe po bën reforma në vazhdimësi, me të vetmin qëllim që sistemi gjyqësor të funksionojë sa më mirë. Presidenti ka shtuar se në Republikën e Kosovës, që nga shpallja e pavarësisë, ka filluar një jetë e re, jetë me plotë dinamizëm dhe zhvillim, në të gjitha fushat, prandaj  na duhet një punë e palodhshme, në veçanti në fushën e drejtësisë.

Sipas tij, institucionet e Kosovës kanë punuar në plotësimin e legjislacionit që do të bëjë më të lehtë punën e gjyqtarëve. “Të gjithë duhet të jemi të angazhuar për respektimin e rendit juridik dhe kushtetues e ligjor të Republikës së Kosovës, më qëllim të ecjes përpara dhe që të jemi krah-për-krah me vendet e zhvilluara e demokratike”, ka thënë presidenti.

Gjyqtarët e rinj e kanë bërë betimin dhe janë zotuar që do t’i qëndrojnë besnikë Kushtetutës së  Republikës së Kosovës.