Presidentja e Kosovës pret në takim komandantin e ri të KFOR-it

Foto FB: Presidenca e Republikës së Kosovës

Presidentja e Kosovës, Vjosa Osmani, ka pritur në takim komandantin e ri të KFOR-it, gjeneralmajor Özkan Ulutaş.

Sipas njoftimit nga Zyra e Presidencës, Osmani ka përmendur në takim rëndësinë e koordinimit në përballjen e kërcënimeve nga Serbia.

“Gjithashtu, Presidentja Osmani theksoi rëndësinë e koordinimit në përballjen me sukses ndaj sfidave e kërcënimeve të hapura nga Serbia që tentojnë të cenojnë sigurinë, stabilitetin dhe integritetin territorial të vendit, veçanërisht pas sulmit terrorist të 24 shtatorit në veri të vendit”, ka thënë ajo, përcjell albinfo.ch.

Në anën tjetër, Ulutaş u shpreh se do të bashkëpunojë ngushtë me Presidenten Osmani dhe të gjitha institucionet e tjera vendore për të realizuar përgjegjësinë e tij në shërbim të sigurisë dhe mbrojtjes së paqes dhe stabilitetit bazuar në mandatin e misionit të KFOR-it në Kosovë.