Presidentja Shiroka Pula ka uruar Shaip Kamberin dhe Visar Mehmetin për fitoren në zgjedhje dhe sigurimin e dy mandateve për përfaqësimin e shqiptarëve në Kuvendin e Serbisë.
Në urimin e saj, presidentja vlerësoi se shqiptarët e Preshevës, Bujanocit dhe Medvegjës, përmes këtyre dy mandateve, dëshmuan se bashkimi politik, besimi i qytetarëve dhe përkushtimi i përbashkët sjellin rezultate.
Ajo uroi që ky rezultat të shërbejë si pikënisje për një përfaqësim më të fuqishëm politik, mbrojtje më efektive të të drejtave të shqiptarëve, zhvillim ekonomik dhe respektim të plotë të dinjitetit kombëtar.
Presidentja Shiroka Pula u bëri thirrje dy deputetëve që të ruajnë unitetin edhe gjatë mandatit të ri, duke theksuar se forca e vërtetë qëndron te bashkimi.
