Presidentja u vonua, dështon takimi për Asociacionin me AAK-në

Ramush Haradinaj, Facebook

Ka dështuar të mbahet takimi mes presidentes Vjosa Osmani dhe kryetarit të Aleancës për Ardhmërinë e Kosovës (AAK), Ramush Haradinaj, gjatë së hënës.

Në një përgjigje për media, AAK-ja tha të martën se ka pasur vullnet të mirë për të diskutuar mbi Draftstatutin e Asociacionit, por “presidentja nuk respektoi orarin e caktuar nga vetë ajo”.

“E kishim një vullnet të mirë për të biseduar me Presidenten Osmani për çështjet me rëndësi për vendin, veçanërisht për draft-statutin e Asociacionit. Kryetari Ramush Haradinaj si dhe Sekretari i Përgjithshëm, Muharrem Nitaj, ishin në Presidencë në orarin e përcaktuar nga presidentja Osmani, por fatkeqësisht Presidentja nuk respektoi orarin e caktuar nga vetë ajo dhe për këtë arsye takimi nuk është realizuar”, ka thënë zëdhënësi i partisë opozitare, Kushtrim Xhemaili.

Osmani pati paralajmëruar takime me liderët opozitarë. Të hënën u takua me kryetarin e Lidhjes Demokratike të Kosovës, Lumir Abdixhiku, ku u diskutua për draftin e statutit të Asociacionit të Komunave me shumicë serbe.