Prishet avioni i linjës Vjenë – Prishtinë, detyrohet të ulet në Beograd

Fluturimi i nisur mbrëmë nga Vjena e Austrisë, që për destinacion kishte aeroportin e Prishtinës, nuk arriti që të bëjë ulje në aeroportin ‘Adem Jashari’ në kryeqytet.

Ky aeroplan i kompanisë ‘Austrian Airlines’, i mbushur me kosovarë ka bërë ulje të detyrueshme në aeroportin ‘Nikola Tesla’ të Beogradit.

Sipas informacioneve të mediave kosovare, aeroplanit i ishte prishur një motor, ndërsa pasagjerët janë njoftuar nga ekuipazhi se duhet të zbresin menjëherë në Beograd.

Për problemet teknike të aeroplanit, e ka konfirmuar edhe zëdhënësi i Aeroportit të Prishtinës, Driton Hyseni.

“Për shkak të problemeve teknike është bërë ulja përgjatë arritjes në Prishtinë, saktësisht në aeroportin e Beogradit. Sipas deklarimeve të kompanisë së fluturimit, kjo ulje ishte saktësisht për probleme teknike”, ka thënë Hyseni për mediat tona.

Ende nuk ka informata zyrtare se çfarë do të bëhet me pasagjerët të cilët kanë mbetur ende në aeroportin e Beogradit.