Problemi teknik në kufirin e Malit të Zi: Të gjithë kosovarët në kërkim nga Interpoli !

unsplash

Shumë kosovarë kanë pritur për orë të tëra të premten në pikëkalimin kufitar mes Malit të Zi dhe Shqipërisë në Bozhaj, për shkak se sistemi i ka paraqitur të gjithë kosovarët si të kërkuar prej Interpolit, përcjell albinfo.ch.

“Vijesti” ka shkruar se problemi ka qenë në softuerin e Interpolit dhe ka zgjatur të paktën tri orë.

Në qëndrimin zyrtar nga Policia e Malit të Zi thuhet se sistemi është rregulluar në mbrëmje. Sipas njoftimit, autoritetet e Malit të Zi më pas i kanë lëshuar të paktën tetë shtetas të Kosovës për të vazhduar rrugën drejt Prishtinës.

Sipas raportimit, edhe policët e kishin të qartë se ka problem me sistemin e Interpolit, por për shkak të domosdoshmërisë së kontrollit nuk kanë lejuar shtetasit e Kosovës ta kalonin kufirin.

“Kjo ndodh rrallëherë”, ka thënë Policia e Malit të Zi.