Prodhimet “Made in Kosova” të padëshiruara në BE

Me të parë vendin e origjinës së prodhimit “Made in Kosova”, qytetarët e vendeve të BE-së kanë përshtypjen se këto produkte janë të dobëta

Qytetarët e vendeve të Bashkimit Evropian hezitojnë t’i konsumojnë produktet që kanë mbishkrimin e prodhimit “Made In Kosova”. Me të parë vendin e origjinës së prodhimit, qytetarët e vendeve të BE-së kanë përshtypjen se këto produkte janë të dobëta.

Ky “fenomen” ka shqetësuar prodhuesit kosovarë, të cilët përveç vështirësive për t’i shitur produktet e tyre në vendet fqinje, për shkak të problemeve politike, tanimë janë duke hasur një varg pengesash edhe me eksportin në vendet anëtare të BE-së.

Eksportuesit e paktë që i ka vendi thonë se kjo po i dekurajon ata për të rritur investimet në prodhimtarinë e tyre.

Një prodhues vendi në kushte anonimiteti i ka thënë KTV-së se gjatë përpjekjeve të tij për të hyrë me prodhimet e tij në Gjermani, një gjë e tillë i është pamundësuar për shkak se i është kërkuar të hiqet mbishkrimi Made in Kosova, pasi që prodhimet me këtë mbishkrim po konsiderohen të kualitetit të dobët.

Një fakt të tillë e pranojnë edhe zyrtarë të Odës Ekonomike të Kosovës. Ndërsa, ministrja e Tregtisë dhe Industrisë, Mimoza Kusari-Lila, pret që këto probleme të zgjidhen pas arritjes së marrëveshjes së Asocim-Stabilizimit me Bashkimin Evropian.

Eksporti i prodhimeve të Kosovës në tregjet e vendeve të BE-së ka shënuar një rritje të lehtë.