Protestë kundër ratifikimit të marrëveshjes

Disa nga aktivistët e VV janë arrestuar nga Policia e Kosovës, përfshirë këtu edhe Dardan Molliqajn, sekretarin organizativ të Lëvizjes Vetëvendosje

Disa qindra aktivistë të Lëvizjes Vetëvendosje, po protestojnë para objektit të Kuvendit të Kosovës, për të kundërshtuar ratifikimin e Marrëveshjes Kosovës-Serbi. Protestuesit ishin tubuar në orët e hershme të mëngjesit, ndërsa Policia e Kosovës po tenton t’i largojnë nga hyrjet për në Kuvend.

Madje, sipas Vetëvendosjes, disa nga aktivistët e saj janë arrestuar nga Policia e Kosovës, përfshirë këtu edhe Dardan Molliqajn, sekretarin organizativ të Lëvizjes Vetëvendosje.

Kjo lëvizje iu ka bërë thirrje protestuesve që të ruajnë energjinë, sepse duhet të qëndrojnë para legjislativit me ditë e me net, për të kundërshtuar ratifikimin e marrëveshjes me Serbinë.

Demonstruesit janë ndarë në dy hyrjet e Kuvendit, me qëllim që të kundërshtojnë zhvillimin seancës, e në këtë mënyrë të pamundësojnë edhe hyrjen e ligjvënësve në Kuvend. Siç raportojnë mediet, protestuesit janë munduar ta ndalin edhe hyrjen e ambasadores amerikane në Kosovës, Tracey Jacobson.

Ndryshe, sot Kuvendi i Kosovës e ka në agjendë pune shqyrtimin dhe miratimin e projektligjit për ratifikimin e marrëveshjes Kosovë-Serbi. Marrëveshja me Serbinë është nënshkruar nga dy kryeministrat, Hashim Thaçi dhe Ivica Daçiq më 19 prill të këtij viti.

Kjo marrëveshje i ka hapur rrugë Koosvës dhe Serbinë për integrim në BE. Marrëveshja është kundërshtuar nga Vetëvendosje e cila konsideron se me këtë marrëveshje është nënshkruar bosnjëzimi i Kosovës dhe serbeve në veri iu është dhënë një antonimi e pashpallur.