Protestuesit djegin goma para Parlamentit shqiptar

Përpara Parlamentit të Shqipërisë po mbahen fjalime të shumta, ish-deputetë dhe qytetarë të thjeshtë.

Nga momenti në moment ka filluar të tensionohet situata përpara Parlamentit të Shqipërisë.

Disa protestues kanë djegur goma dhe pankarta, si dhe kanë hedhur tymuese dhe kapsolla drejt efektivë të policisë, përcjell albinfo.ch.

Në rast se situata vijon të tensionohet edhe më shumë, mundet që policia të kundërpërgjigjet me gaz lotsjellës, ndërkohë që të pranishëm janë edhe liderët e opozitës.

Kreu i Partisë Demokratike, Lulzim Basha ka deklaruar nga foltorja e protestës se kryeministri Edi Rama do të udhëtojë drejt Italisë për të marrë azil politik.

“Tha që do iki të sqaroj italianët për ato që nuk e besojnë më shqiptarët. Por, burime thonë se po ikën në Itali për azil politik”, deklaroi Basha.

“Sovrani e ka marrë vendimin, e ka kuptuar fare mirë, prej javësh ajo godinë nuk është godina e Kuvendit të Shqipërisë, por godina e kolerës së krimit dhe korrupsionit”, shtoi Basha.

“Nuk ka Evropë me një Shqipëri si Kolumbi, nuk ka Evropë me qeverinë e bërë njësh me krimin, nuk ka integrim me korrupsionin ne nivelet më të larta. Maduro i Ballkanit nuk e hap derën e Evropës, por ne do ta hapim derën e drejtësisë dhe burgut për të dhe hajdutët. Vetëm ndarja dhe balancimi i pushteteve, rënia në gjunjë ne qeverisë së ardhshme para dinjitetit të cdo shqiptari për ta mbrojtur, vetëm zgjedhjet e lira dhe të ndershme do ta hapin derën e Evropës, vetëm ne të bashkuar e të vendosur si kurrë më parë”, u shpreh kryedemokrati.

Kryeministri shqiptar Edi Rama njoftoi në Twitter se do të udhëtojë në Itali “për të mbrojtur Shqipërinë, pas cenimit të rëndë që iu bë përmes shfaqjes së turpshme të dhunës partiake të 16 shkurtit e në vazhdim”.