Që nga sulmi në Banjskë janë mbyllur 20 rrugë ilegale

Keystone EPA/GEORGI LICOVSKI

Policia e Kosovës ka mbyllur mbi 20 rrugë ilegale në veri të Kosovës që nga sulmi në Banjskë më 24 shtator.

Zëvendësdrejtori i Policisë për rajonin e veriut, Veton Elshani, ka konfirmuar se disa prej rrugëve janë mbyllur me ekskavator.

“Policia kufitare i ka mbyllur mbi 20 rrugë ilegale, por i ka mbyllë prej rastit të Banjskës deri më sot, pra nuk janë mbyllur sot ato. Disa prej këtyre rrugëve janë mbyllur me eskavator duke hapur gropa, disa me beton”, tha Elshani, raporton “Betimi për Drejtësi”.

Lidhur me aksionin e sotëm të Policisë së Kosovës, Elshani tha se bastisjet janë kryer në 13 lokacione në veri. Bastisjet janë kryer lidhur me sulmin në Banjskë, përcjell albinfo.ch.