Qeveria e Cyrihut kundërshton propozimin për banim

Armend Berisha - Cyrih

Partia Social Demokrate e qytetit nisi një propozim të quajtur “Banimi i përballueshëm për Cyrihun”, i cili kërkon që autoritetet komunale të investojnë 250 milionë franga për të blerë më shumë prona dhe tokë për të krijuar banesa më të përballueshme, përcjell albinfo.ch.

Megjithatë, Këshilli i qytetit paraqiti kundërpropozimin e tij këtë javë.

Ndërsa autoritetet nuk e mohojnë që banorët e Cyrihut po përballen me mungesën e përkeqësuar të banesave dhe qirave, të cilat janë ndër më të lartat në Zvicër, ata kanë thënë se shumë nga infrastrukturat e strehimit të kërkuara në propozim tashmë ekzistojnë në një formë ose në një tjetër.

Zyrtarët e qytetit thanë gjithashtu se nuk mund të caktojnë në mënyrë të njëanshme 250 milionë franga për këtë projekt; çdo shpenzim i fondeve publike që tejkalon 20 milionë franga duhet të miratohet nga taksapaguesit në një referendum.