Qeveria e Kosovës miraton nismën për Marrëveshjen e Sigurimeve Sociale me Zvicrën

Me këtë marrëveshje qytetarëve të Kosovës që kanë punuar në Zvicër u mundësohet që ta marrin pensionin e Zvicrës në Kosovë. Negociatat me Zvicrën do të fillojnë javën e ardhshme

Qeveria e Kosovës, në mbledhjen e saj të sotme në mbledhjen e sotme ka miratuar Nismën për lidhjen e marrëveshjes për sigurime sociale ndërmjet konfederatës së Zvicrës dhe Qeverisë së Kosovës. Kjo bëhet e ditur në një kumtesë të lëshuar nga Qeveria e Kosovës.

Me këtë rast, ministri Arban Abrashi tha se pala zvicerane ka shprehur interesin për arritjen e marrëveshjes për sigurime sociale. Me këtë marrëveshje qytetarëve të Kosovës që kane punuar në Zvicër u mundësohet që të mund ta marrin pensionin e Zvicrës në Kosovë. Negociatat me Zvicrën do të fillojnë javën e ardhshme.

Kryeministri i Kosovës, Isa Mustafa, tha se ky është një hap i rëndësishëm për të dy vendet, sepse ka pasur shumë probleme sa i përket sigurimeve sociale me Zvicrën dhe është sukses i Qeverisë që po e përmbyll këtë proces kaq të rëndësishëm për qytetarët e Kosovës që kanë punuar në Zvicër.