Qeveria e Kosovës mirëpret hapjen e urës së Ibrit

Qeveria e Kosovës e quan vendim të drejtë iniciativën e Kuvendit Komunal të Mitrovicës së Veriut për hapjen e plotë për qarkullim të urës mbi lumin Ibër.

“Vendimi për heqjen e pengesave të tilla është veprim i drejtë dhe i duhur. Kosova është e të gjithë qytetarëve të saj dhe ata gëzojnë të drejtën të lëvizin lirshëm në gjithë territorin e saj”, ka thënë për Radion Evropa e Lirë zëdhënësi i qeverisë, Përparim Kryeziu, përcjell albinfo.ch.

Asamblistët e Komunës së Mitrovicës së Veriut miratuan kërkesën për hapjen e urës më 28 prill.

Deri më tani nuk është bërë e ditur se si dhe kur mund të zbatohet ky vendim.

Lista Serbe thotë se ky vendim “shkel marrëveshjet e Brukselit dhe kërcënon drejtpërdrejt paqen”.

“Duam të paralajmërojmë se hapja eventuale e urës pa dyshim që do të rezultojë me incidente në këtë zonë, gjë që duket se është edhe qëllimi i Prishtinës. Ura, ku kanë ndodhur më shumë se 1.000 sulme me motive etnike nga jugu në veri, është simbol i vuajtjes së popullit serb dhe synimi i Prishtinës është që dëbojë serbët e mbetur nga i vetmi mjedis urban ku ata kanë mbijetuar në një numër më të madh”, thuhet në reagimin e kësaj partie që ka mbështetjen e Beogradit, përcjell albinfo.ch.

Lista Serbe kërkoi nga KFOR-i dhe përfaqësuesit e bashkësisë ndërkombëtare që “me urgjencë të pengojnë zbatimin e këtij vendimi”.

Miroslav Lajçak, emisari i Bashkimit Evropian për dialogun Kosovë-Serbi theksoi se tani “nuk është momenti i duhur” për hapjen e urës mbi Ibër, përcjell albinfo.ch.