Qeveria ia vazhdon mandatin EULEX-it

Qeveria miratoi Projektligjin për Ratifikimin e Marrëveshjes së parë me BE-në, me të cilin ia vazhdon mandatin EULEX-it edhe për dy vjet

Qeveria e Kosovës ka miratuar një projektligj me të cilin i mundëson Misionit të Bashkimit Evropian për Sundim të Ligjit (EULEX) vazhdimin e mandatit deri më 15 qershor të vitit 2014. Ky projektligj i është dorëzuar Legjislativit kosovar, ndërsa pas aprovimit me dy të tretat e votave të deputetëve, ligji do të jetë i aplikueshëm. 

Ky projektligj për Ratifikimin e Marrëveshjes së parë Ndërkombëtare mes Kosovës dhe Bashkimit Evropian, u konsiderim historik nga kryeministri Hashim Thaçi. 

Këtij projektligji, ndërkaq i ka paraprirë një letërkëmbim ndërmjet presidentes së Kosovës, Atifete Jahajaga dhe përfaqësueses së lartë të Bashkimit Evropian për Politikë të Jashtme dhe Siguri, Catherine Ashton. Jahjaga kishte kërkuar nga Ashton zgjatjen e mandatit të EULEX-it edhe për dy vitet e ardhshme. 

“Qeveria e Kosovës dhe të gjitha institucionet e shtetit kanë kryer përgatitjet e nevojshme për përmbyllje të suksesshme të pavarësisë së mbikëqyrur. Prandaj, ne sot do të kalojmë Projektligjin për Ratifikimin e Letrave të Shkëmbyera mes Kosovës dhe BE-së, që është marrëveshja e parë bilaterale, por pres që edhe të premten deputetët ta kalojnë dhe të votojnë projektligjin me 2/3 e votave”, tha Thaçi. 

Kosova, sipas kryeministri Thaçi, po e përmbyll me sukses periudhën e mbikëqyrjes së pavarësisë, e cila sipas tij, do të sigurojë paqe e stabilitet për rajonin dhe hap perspektivë evropiane për Kosovën. 

Kryeministri Hashim Thaçi po ashtu njoftoi kabinetin qeverisë edhe për aktivitetet që pritet të zhvillohen me rastin e përmbylljes së mbikëqyrjes ndërkombëtare të pavarësisë.

Ai tha se në Prishtinë do të arrijnë përfaqësues të lartë të SHBA-ve, BE-së, dhe vendeve të  ndryshme që kanë mbështetur pavarësinë e Kosovës. 

Në Mbledhjen e Qeverisë, po ashtu u dhanë në detaje për projektligjin e miratuat dhe amendamentet për vazhdim të mandatit. Zëvendësshefi i qeverisë, Hajredin Kuçi prezantoi në detaje projektligjin, duke e ndarë në tri shtylla kryesore. 

”Çështja e parë është zgjatja e mandatit të EULEX-it në fushat e parapara me marrëveshje deri më 15 qershor 2014, ndërkaq çështja tjetër është delegimi i autoritetit për propozim dhe emërimin e gjyqtarëve dhe prokurorëve ndërkombëtarë në përputhje me Kushtetutën, kurse çështja e tretë garanton imunitet të stafi t të zyrës dhe personelit të EULEX-it”, tha Kuçi, sipas të cilit emërtimi i EULEX-it tash do të jetë EULEX-Kosova.