QKUK: 4-vjeçarja nga Gjakova ka pasur infeksion akut-sepsë

Qendra Klinike Universitare e Kosovës ka reaguar për vdekjen e 4-vjeçares nga Gjakova, që vdiq të hënën në Qendrën Emergjente të QKUK-së.

Në reagimin e tyre thuhet se ajo kishte infeksion akut të rëndë të shkallës së lartë – sepsë.

“Në Qendrën Emergjente të QKUK-së kryhen të gjitha analizat laboratorike dhe ato diganostike – radiologjike, thirrën në konsultë edhe mjekët e lëmenjve përkatëse. Pas të gjitha konsultave, vendoset për trajtim të mëtejmë në Repartin Intensiv në Klinikën e Pediatrisë, me diagnozë të punës Sepsë (infeksion akut i rëndë i shkallës se lartë). Përkundër të gjitha masave reanimatore të ekipeve të mjekëve të Klinikës së Pediatrisë, për shkak të gjendjes së rënduar shëndetësore, fëmija ndërron jetë me datë 19 shkurt 2024”, thuhet në njoftim.

SHSKUK-ja ka thënë se ka kërkuar raporte të detajuara nga Spitali në Gjakovë dhe QKUK-ja.

Ky institucion ka apeluar që të mos ketë spekulime për rastin deri në rezultatet e hetuesisë, për të cilat është shprehur se do t’i marrë parasysh për veprime të mëtejme.