Rama e Thaçi: Ivanov, pa shqiptarë nuk ka Maqedoni

Dy liderët institucional, në Tiranë e Prishtinë, Edi Rama e Hashim Thaçi ia përkujtuar presidentit maqedonas, Gjorgje Ivanov se “pa shqiptarët nuk ka Maqedoni”

Pas kryeministrit të Shqipërisë, Edi Rama edhe presidenti i Kosovës, Hashim Thaçi i ka reaguar presidentit të Maqedonisë, Gjorgj Ivanov lidhur me gjuhen shqipe dhe shqiptarët. Dy liderët institucional, në Tiranë e Prishtinë, ia përkujtuar presidentit maqedonas, se pa shqiptarët nuk ka Maqedoni.

“Zoti Ivanov, gjuha shqipe s’është e armikut po e një populli shtetformues në Maqedoni. Pa shqiptarët nuk ka Maqedoni i dashur President!”, ka shkruar kryeministri i Shqipërisë, Edi Rama.

Edhe për presidentin e Kosovës, Hashim Thaçi, deklaratat e fudnit të Ivanovit janë shqetësuese dhe jo demokratike. Thaçi i cilësoi zhvillimet politike në Maqedoni si “shumë shqetësuese”.

Ndryshe, një ditë më parë, presidenti i Maqedonisë, Gjorge Ivanov, tha se nuk do ta mandatojë për kryeministër liderin e Partisë Social-Demokratike të Maqedonisë, Zoran Zaev, për shkak të platformës me partitë shqiptare, që, sipas tij, rrënon karakterin unitar të Maqedonisë.

“Presidenti Ivanov abuzoi me Kushtetutën dhe ligjet në qasjen e tij armiqësore e antishqiptare, që përbëjnë një të tretën e qytetarëve të këtij shteti. Me vendimin e tij, presidenti Ivanov varrosi demokracinë, duke mos njohur vullnetin e qytetarëve, Kushtetutën dhe ligjet, si dhe varrosi Marrëveshjen e Ohrit”, tha Thaçi në një postim në Facebook.

Sipas tij, shqiptarët në Maqedoni janë popull shtetformues dhe Maqedonia duhet të jetë shtet i të gjithë qytetarëve të saj.

“Pa të drejta të barabarta të shqiptarëve në Maqedoni, humb kuptimi i funksionimit të shtetit të Maqedonisë. Në fund, shqiptarët duhet të marrin fatin e të drejtave të tyre në duart e veta”, deklaroi presidenti i Kosovës, Hashim Thaçi.