Rama fton bizneset e huaja të investojnë në Shqipëri

Keystone

Kryeministri i Shqipërisë, Edi Rama ka thënë se vendi është i sigurt për të bërë biznes dhe ka potenciale ende të pashfrytëzuara, duke përmendur si pikë reference turizmin.

“Për çdo ekonomi, investimet e huaja direkte janë domosdoshmëri jetike dhe sot përbëjnë prioritetin e prioriteteve tona. Nëse shohim pas, është bërë shumë, si rezultat i një politike të fokusuar te nxitja dhe mbështetja e biznesit. Kemi rreth 50 mijë biznese më shumë që operojnë në Shqipëri sesa 4 vite më parë”, ka deklaruar kryeministri Rama, përcjell albinfo.ch.

Kreu i qeverisë shtoi se kërkesa ka të bëjë me turizmin e nivelit më të lartë, për të cili tha se ekzekutivi do ta vendos si çështje prioritare.

“Kush investon sot në Shqipëri, nuk do të pendohet kurrë. Kush ngurron sot, do të thotë si ka mundësi që ma zunë radhën të tjerët. Është vend që kthen shumë më tepër nga sa jep”, ka thënë Rama.