Rama: Rruga e “Arbërit” të vazhdojë edhe në Maqedoni

Rruga do të kushtojë 33,6 miliardë lekë dhe për 100 kilometra do ta shkurtojë largësinë nga Tirana deri në Dibër

Në takimin e përbashkët mes qeverisë së Shqipërisë dhe Maqedonisë që do të mbahet në Pogradec pala shqiptare do të kërkojë nga ajo maqedonase që ta vazhdojë rrugën “Arbëri” edhe në territorin e saj, ka thënë kryeministri Edi Rama gjatë vizitës së tij në qytetin e Peshkopisë.

Ndërtimi i Rrugës së Arbrit në gjatësi prej 75 kilometra, zyrtarisht  do të fillojë vitin e ardhshëm. Rruga do të kushtojë 33,6 miliardë lekë dhe për 100 kilometra do ta shkurtojë largësinë nga Tirana deri në Dibër.

“Në takimin me kryeministrin e Maqedonisë në tetor, u pajtuam për të realizuar në Pogradec një mbledhje qeverie, ku do vendosim domosdoshmërinë që edhe pala maqedonase ta kompletojë rrugën në krahun tjetër që përmes Dibrës, porti Durrësit dhe zona të tjera, të mund të aksesohen më shpejt:, ka thënë Rama.