Refugjatët mundohen që me tren të mallrave të hynë në Gjermani

Për shkak se trenat e udhëtarëve po kontrollohen gjithnjë e më shumë, tani refugjatët mundohen të hyjnë në Gjermani me trenat e mallrave

Policia gjermane ka shtuar kontrollet për të ndaluar emigrantët ilegalë që të hyjnë në Gjermani. Tashmë më shpesh po kontrollohen trenat e mallrave nga Italia dhe Austria, sepse tani shumë refugjatë mundohen të hyjnë në Gjermani me to.

Për shkak se trenat e udhëtarëve po kontrollohen gjithnjë e më shumë,  tani refugjatët mundohen të hyjnë në Gjermani me trenat e mallrave, raporton “DW”.

Shumë azilantë fshihen poshtë vagonëve. Forcat tokësore mbështeten nga ajri nga helikopterë me kamera me rreze infra të kuqe. Kur ata diktojnë diçka njoftojnë patrullat në tokë, përcjell albinfo.ch.

Por, menjëherë kontrollet kanë qenë të efektshme. Polica kontrollon një tren mallrash që po vjen nga Verona. Treni ka kaluar nga Italia në Austri para se të hyjë në Gjermani. Papritur në fund të trenit shpërthen paniku: poshtë një vagoni janë fshehur dy refugjatë afrikanë, që kanë provuar të hyjnë në Gjermani duke shfrytëzuar natën.

Refugjatët janë të rraskapitur, mezi dalin nga vendi ku janë fshehur. Afrikanët duhet të kenë kaluar rreth nëntë orë në tren. Ata janë nga Nigeria dhe i kanë hipur trenit të mallrave në Bolzano të Italisë. Bolzano është vendi nga kalojnë të gjithë trenat e mallrave që vijnë nga Italia për Evropë, dhe prej këtu nisen shumë refugjatë.

Pasi nuk kanë shkaqe për azil në Gjermani ata do të kthehen në Austri. Prej aty ata ndoshta do t’i dëbojnë për në Itali, në vendin ku kanë shkelur fillimisht territorin e BE-së.