REL: Masat ndaj Kosovës varen nga rrjedha e dialogut

Masat ndëshkuese të vendosura në muajing korrik nga Bashkimi Evropian ndaj Kosovës mund të hiqen ose shtohen, por gjithçka varet nga rrjedhja e situatës në terren dhe dialogu për normalizimin e raporteve me Serbinë.

Të paktën kështu ka raportuar për REL duke cituar një burim në Bruksel, i cili shtoi se për çështjen e masave, shefi i diplomacisë së Bashkimit Evropian, Josep Borrell, ka diskutuar me kryeministrin e Kosovës, Albin Kurti, gjatë rundit të fundit të dialogut më 14 shtator.

Sipas burimit, Borrell i ka thënë Kurtit se është i gatshëm të rekomandojë heqjen e masave nëse do të raportonte për sukses në takim, por takimi dështoi, pasi sipas Borrell-it, Kosova nuk pranoi një propozim të BE-së për marrëveshjen për normalizim, andaj nuk pati edhe lëvizje sa u përket masave, përcjell albinfo.ch.

Zyrtari i BE-së, i tha REL-it se masat ndaj Kosovës janë fleksibile, të përkohshme, mund të hiqen, por edhe të shtohen, pasi për to janë pajtuar 27 shtetet anëtare të bllokut, të cilat nuk i vënë në dyshim masat.

Ndryshe, masat ndëshkuese përfshijnë: suspendimin e përkohshëm të punës së trupave të krijuara në bazë të Marrëveshjes së Stabilizim Asociimit, mosftesën e Kosovës në takime të nivelit të lartë dhe suspendimin e vizitave bilaterale, përveç atyre që fokusohen në adresimin e krizës në veri të Kosovës në kuadër të kornizës së dialogut të lehtësuar nga Bashkimi Evropian, ndaljen e programimit të fondeve për Kosovën nga IPA 2024.