Remitencat : Niveli më i ulët historik, që nga viti 2004

Tash po ndodh e kundërta, janë familjet shqiptare që po ndihmojnë të afërmit e tyre jashtë vendit

Remitancat që emigrantët sjellin nga vendet ku jetojnë e punojnë  për të afërmit e tyre në Shqipëri shënuan nivelin më të ulët të dekadës në gjashtë muajt e parë të 2013.

Për të dytin vit radhazi po vihet re tashmë një risi: janë familjet shqiptare ato që po ndihmojnë të afërmit e tyre jashtë vendit.

Sipas gazetës “Shqip” të Tiranës të dhënat bëhen të ditura nga bilanci i llogarive për tremujorin e dytë të vitit 2013, publikuar nga Banka e Shqipërisë.

 Për 6 muajt e parë të vitit bëhet fjalë për një vlerë që kap shumën prej 4 milionë eurosh.

Kryesisht janë prindërit ata që u dërgojnë para fëmijëve në shkollë, por ka dhe raste kur familjet në Shqipëri ndihmojnë të afërmit në Greqi e Itali, që mund të kenë mbetur të papunë.

Nga ana tjetër janë edhe të huajt që punojnë në Shqipëri, që mund t’u dërgojnë para familjeve në vendin e tyre të origjinës.

Në kahun tjetër, paratë që emigrantët dërgojnë për të afërmit e tyre në Shqipëri po vihet re një tendencë e fortë tkurrëse.

Statistikat tregojnë se prurjet e emigrantëve për tremujorin e dytë ishin 105 milionë euro, niveli më i ulët historik, që nga viti 2004.