Reshjet shkaktojnë vërshime

Siç raportojnë shtabet e krizave, nga vërshimet e lumenjve, janë përmbysur shtëpi dhe objekte tjera si dhe nën ujë kanë përfunduar qindra hektarë tokë në Maqedoni

Reshjet e shiut që kanë vazhduar për dy dit rresht, kanë shkaktuar vërshime në disa rajone të Maqedonisë ndërsa raportohet se nga dalje e lumenjve ka pasur edhe përmbytje. Sipas medieve nga Shkupi, nga vërshimet e lumenjve, janë përmbysur shtëpi dhe qindra hektarë tokë.

Qendra për menaxhim me kriza ka informuar për daljen e lumit Vardar nga shtrati në zonën e komunës së Sarajit. Përveç dëmeve në tokat e kësaj zone, uji ka vështirësuar edhe lëvizjen e lirë të qytetarëve të kësaj komune, ndërsa probleme kanë pasur sidomos banorët e Rashçes.

Reshjet e shiut sipas INA-s, kanë shkaktuar probleme edhe në zonën e Kumanovës, por edhe zonën e Pollogut.

Në Kumanovë kanë informuar se janë përmbysur disa hektarë tokë, por edhe bodrume të shtëpisë në fshatin Opajë, për shkak të daljes nga shtrati të lumit të Sllupçanit. Po ashtu nga shtrati ka dalë edhe lumi i Mateçit, i cili ka vërshuar në tokën periferike të fshatit.