Rexhepi shkarkon tre zyrtarë në MPB

Në njoftimin e MPB-së nuk thuhet se largimi ka ndodhur për shkak të skandalit, por për mosefikasitet në punë

Pas skandalit të tenderit të pasaportave, Ministri i Punëve të Brendshme, Bajram Rexhepi ka shkarkuar nga detyre këshilltarin Politik dhe njëherit shefin e Kabinetit të tij, Sedat Gashin, si dhe ka pezulluar nga detyra dy drejtorë të departamenteve. Në njoftimin e MPB-së nuk thuhet se largimi ka ndodhur për shkak të skandalit, por për mosefikasitet në punë. “Ministria e Punëve të Brendshme ka marrë vendim për shkarkimin nga pozita e Këshilltarit Politik të MPB-së, Sedat Gashi dhe pezullimin nga puna me pagesë, të Kryeshefit Ekzekutiv të Agjencisë për Regjistrim Civil, Blerim Camaj dhe drejtorin e Departamentit për Prodhim të Dokumenteve, Besnik Berisha.”, thuhet në njoftimin zyrtar. Vendimet, sipas MPB-së, janë marrë në mbështetje të Nenit 145 të Kushtetutës së Republikës së Kosovës, duke marrë parasysh nenet që kanë të bëjnë për administratën shtetërore të Republikës së Kosovë.“Pezullimi i këshilltarit Gashi, është bërë për shkak të mospërmbushjes së detyrave dhe përgjegjësive si Këshilltarë Politik, ndërsa për zyrtarët, Camaj dhe Berisha për shkak të keqmenaxhimit dhe marrëdhënieve të këqija ndër njerëzore me stafin”, thuhet më tej në njoftimin e MPB-së.Ndryshe, dy javë më parë u zbulua një skandal në MPB, ku zyrtarë të kësaj të fundit qëllimisht ia kishin ndërruar dstinacionin 1.4 milion eurove të determinuara për një kompani austriake e cila kishte fituar tenderin për prodhimin e pasaportave biometrike. Këto mjete kishin shkuar në xhirollogari të një qytetareje gjerman, e cila më pas ua kishte shpërndarë zyrtarëve në MPB.