Romët më të diskriminuarit në Kosovë

Me rastin e rastin e Ditës Ndërkombëtare të Romëve, shefi i Misionit të OSBE-së në Kosovë, ambasadori Schlumberger kërkoi që më shumë përkushtim për komunitetin RAE

Komuniteti romë, ashkali dhe egjiptian (RAE) mbetet më i diskriminuari në shoqërinë  kosovare, prandaj kërkohet më shumë angazhim që këto pakica të integrohen. Kështu deklaroi Shefi i Misionit të OSBE-së në Kosovë, Ambasadori Jean-Claude Schlumberger, me rastin e rastin e Ditës Ndërkombëtare të Romëve.

“Pjesëtarët e komunitetit rom, së bashku me komunitetin ashkali dhe egjiptas, ende diskriminohen në forma të ndryshme. Ata ballafaqohen me sfida gjatë qasjes në edukim, shërbime shëndetësore, strehim dhe punësim. Kjo gjendje duhet të ndryshoj,” tha Schlumberger.

Strategjia aktuale dhe plani i veprimit për integrimin e këtyre komuniteteve të ndjeshme, sipas tij, përfundon këtë vit. Prandaj Schlumberger inkurajoi Qeverinë e Kosovës që të sigurojnë një proces gjithëpërfshirës gjatë hartimit të strategjisë së re për integrimin e këtyre komuniteteve.

Ai tha se duhet të dëgjohet zëri i përfaqësuesve të shoqërisë civile dhe vetë komuniteteve në mënyrë që të ofrohet përgjigje adekuate për nevojat dhe shqetësimet e tyre.

“Angazhimi i shtuar nga institucionet e nivelit qendror dhe lokal si dhe ndarja e më shumë fondeve janë qenësore për ta çuar këtë proces përpara,” deklaroi Schlumberger.

“Këto plane përfshijnë veprime konkrete për integrimin e komunitetit rom, ashkali dhe egjiptas. Me përkrahjen e duhur nga niveli qendror, komunat do të jenë në gjendje që dukshëm të përmirësojnë kushtet e jetës për këto komunitete,” përfundoi ambasadori i OSBE-së në Kosovë.