Rrahet para banesës së tij drejtori i SHKK-së, Sokol Zogaj

Gjendja shëndetësore e ushtruesit të detyrës së drejtorit të Shërbimit Korrektues të Kosovës Sokol Zogaj është jashtë rrezikut për jetën. Mjekët në QKUK kanë thënë se ai ka marrë lëndime në kokë por që nuk janë serioze

Ministria e Drejtësisë e Kosovës njofton se është sulmuar brutalisht nga persona deri tash të pa njohur Ushtruesi i Detyrës së Drejtorit të Përgjithshëm të Shërbimit Korrektues të Kosovës, Sokol Zogaj. Ngjarja ka ndodhur në mëngjesin e sotëm deri sa Zogaj ishte duke dalë nga banesa e tij në Prishtinë, transmeton albinfo.ch. “Ministria e Drejtësisë dënon ashpër sulmin brutal ndaj Zogaj, dhe i fton organet kompetente ta trajtojnë rastin, në mënyrë që kryerësit e këtij akti brutal të dalin para organeve të drejtësisë. Ministria e Drejtësisë  do të bashkëpunojë me organet kompetente deri në zbardhjen e plotë të sulmit brutal ndaj z. Zogaj”, thuhet në reagimin e kësaj ministrie.

Gjendja shëndetësore e ushtruesit të detyrës së drejtorit të Shërbimit Korrektues të Kosovës Sokol Zogaj është jashtë rrezikut për jetën. Mjekët në QKUK kanë thënë se ai ka marrë lëndime në kokë por që nuk janë serioze. Ndërsa sulmi ndaj tëij është dënuar dhe kërkohet që ata që kryen sulmin të vihen para drejtësisë. Këshilli për Mbrojtjen e të Drejtave e të Lirive të Njeriut Sulmin ndaj Zogaj, e konsideron si sulm ndaj institucioneve shtetërore dhe përpjekje për të kontrolluar nga ana e krimit, transmeton albinfo.ch.

“KMDLNj kërkon hetime të shpejta  dhe vënie para organeve të drejtësisë së atyre që e kryen këtë veprim kriminal si edhe rritjen e sigurisë për ata që drejtojnë institucionet me rëndësi në rastin konkret SHKK. Ky sulm është përpjekje për frikësim, inkurajim për kriminelët, shtytje për urdhërdhënësit dhe dekurajim për drejtësinë”, thuhet në reagim. Edhe Qendra Kosovare për Rehabilitimin e të Mbijetuarve të Torturës (QKRMT), dënon sulmin ndaj Sokol Zogaj dhe u bën thirrje organeve kompetente që sa më ta trajtojnë rastin dhe kryesit e sulmit të përgjigjen përpara organeve të drejtësisë. Ndërsa policia e Kosovës ka thënë se pas  ekzaminimit të vendit të ngjarjes si dhe përfundimit të procedurave fillestare, puna hetimore e policisë është fokusuar në identifikimin e personave të dyshuar.