Rreth 1.6 milion pelegrinë myslimanë nisen në Haxh

Arabia Saudite po përgatitet për organizimin e Haxhit, duke filluar të dielën, derisa 1.6 milionë besimtarë myslimanë kanë arritur në “mbretërinë ultrakonservative”.

Pelegrinazhi prezanton një nga pesë shtyllat e islamit dhe kërkohet që të paktën një herë gjatë jetës të vizitohet nga myslimanët.

Ditët e fundit, besimtarët kanë arritur në Mekë nga e gjithë bota, duke thirrur “Këtu jam Zot, i përgjigjem thirrjes tënde, këtu jam”.

Haxhi u mundëson besimtarëve të jenë më afër Zotit, shkruan REL, përcjell Albinfo.ch.

“Ndjenjat e mia janë të papërshkrueshme”, tha Imad Abdel Raheem, një pelegrin egjiptas.

Burrat që vizitojnë Haxhin vishen vetëm me një pelerinë të bardhë, që simbolizon bashkimin në mes të myslimanëve dhe barazinë para Zotit. Gratë veshin fustane të gjatë, mbulojnë flokët dhe nuk mbajnë grim për të shfaqur pastërtinë shpirtërore para Zotit.