Rreth 70 luftëtarë të ISIS, janë kthyer në Maqedoni

Presidenti Gjorgje Ivanov tha se nga Maqedonia, të regjistruar si pjesëtarë në luftimet në Siri e Irak janë 110 persona, ndërsa 25 janë vrarë. 70 prej tyre, sipas tij, janë kthyer

Maqedonia ka shtuar masat e sigurisë pas një deklarate që dha presidenti i Maqedonisë, Gjorge Ivanov se në këtë shtet janë kthyer rreth 70 luftëtarë që kanë marrë pjesë në luftën qytetare në Siri e Irak (ISIS). Sipas tij, nga Maqedonia të regjistruar si pjesëtarë në luftimet në Siri janë 110 persona, ndërsa 25 janë vrarë.

Presidenti tha në një konferencë për media se korridori me refugjatët përdoret nga terroristët për të hyrë në Maqedoni.

Bashkësia e Fesë Islame (BFI) në Shkup, ndërkaq vazhdon t’u bëj thirrje qytetarëve që mos të shkojnë në luftërat e huajave, ndërsa ritheksojnë angazhimin e tyre për rehabilitimin e këtyre personave në aspektin social dhe ekonomik.

“Dhashë Zoti që të kthehen njerëzit dhe të jetojnë në shtetin e tyre amë, sepse myslimanët tanë të luftojnë në ndonjë shtet tjetër. Ishte edhe vet deklarata e kryetarit i cili tha se vatani jonë është vendi ku jetojmë ne këtu dhe jo diku tjetër dhe xhihadi bëhet këtu në mbrojtje të vendlindjes tonë.”, deklaroi Irsal Jakupi, sekretar i BFI-së.

Jakupi u shpreh se BFI-ja i ka nën kontroll të gjitha xhamitë e vendit. “Të gjitha xhamitë, 100 për qind janë nën kontroll të BFI-së. Të gjitha këshillat e xhamive, të gjithë imamët janë nëpunës të BFI-së”, tha Irsal Jakupi, sekretar i BFI-së.

Ndërkohë, nga MPB-ja kanë shtuar masat e sigurisë dhe patrullimet. Nëpër rrugët e qytetit vërehet numër i shtuar policësh nën uniformë, dhe madje të armatosur me kallashnikovë. Këto masa sigurie u rritën pas mbledhjes së këshillit të Sigurisë Kombëtare, pas ngjarjeve në Paris.