Rritet ndjeshëm kërkesa për fikëse zjarri në Zvicër pas tragjedisë në Crans-Montana

Pas tragjedisë në Crans-Montana, shpërthen kërkesa për pajisje kundër zjarrit

Pas tragjedisë së fundit në Crans-Montana, dyqanet online në Zvicër po raportojnë një rritje të madhe të kërkesës për pajisje kundër zjarrit, përfshirë fikëset e zjarrit dhe batanijet kundër flakëve, përcjell albinfo.ch.

Sipas shitësve online, shitjet e këtyre produkteve janë rritur deri në pesëfish gjatë ditëve të fundit. Një rritje e tillë reflekton shqetësimin në rritje të qytetarëve për sigurinë në banesa dhe ambiente të mbyllura.

Shembull konkret është Digitec Galaxus, shitësi më i madh online në Zvicër, ku shitjet e detektorëve të tymit janë më shumë se dyfishuar gjatë tre ditëve të para të vitit 2026, krahasuar me të njëjtën periudhë të vitit të kaluar.

Rritja ka qenë edhe më e theksuar për pajisjet e tjera të sigurisë nga zjarri. Sipas një zëdhënësi të kompanisë, shitjet e batanijeve kundër zjarrit janë katërfishuar, ndërsa ato të fikëseve të zjarrit janë rritur deri në pesë herë.

Ekspertët e sigurisë theksojnë se interesimi i shtuar për këto pajisje mund të kontribuojë në parandalimin e tragjedive të ngjashme në të ardhmen, duke rritur ndërgjegjësimin për masat bazë të mbrojtjes nga zjarri.

---