Rugova përjetësohet në bronz

Në inaugurimin e shtatores së Dr. Rugovës kanë marrë pjesë mijë qytetarë të Kosovës, ish-simpatizantë dhe përkrahës të rrymës së tij demokratike 　

Ish-presidenti i Kosovës, Ibrahim Rugova u përjetësua të premten në shtatore bronzi, në një ceremoni të veçantë organizuar nga Komuna e Prishtinës. Rugova u cilësua si projektuesi i pavarësisë së Kosovës dhe si njeriu që shpëtoi një komb në kohët më të vështira. 　　　

　

Në inaugurimin e shtatores së Dr. Rugovës kanë marrë pjesë mijë qytetarë të Kosovës, ish-simpatizantë dhe përkrahës të rrymës së tij demokratike. 　

　

Shtatorja e bronztë është e gjatë 4.25 centimetra në të cilin Rugova paraqitet me hapin e hedhur, dorën e majtë të përthyer dhe shallin e hershëm simbolik. Ajo ka arritur në Prishtinë mbrëmë nën përcjellën e FSK-së, ndërsa është punuar nga skulptori Julian Muqollari nga Tirana.

　

Me rastin e inaugurimit të shtatores Rugova, presidentja Atifete Jahjaga tha se kjo është ditë historike, pasi që “nga sot e përjetësisht në Prishtinë do të qëndrojë shtatorja e presidentit Ibrahim Rugova”.

　

“Kosova e kishte fatin dhe është krenare që konceptin e lirisë dhe pavarësisë e ndërtoi intelektuali Dr. Ibrahim Rugova. Ai na lidhi përjetësisht me SHBA si vend lider e demokratik, si vend mbrojtës i popujve të lirë”, deklaroi presidentja Jahjaha.

　

Duke folur për presidentin Rugova, Jahjaga tha se, Kosova e ka të ardhmen e sigurt në anëtarësimin në NATO dhe BE.

　

Ndërsa kryetrari i Prishtinës dhe lideri i LDK-së, Isa Mustafa tha se Prishtina sot po e inauguron shtatoren e ikones së pavarësisë, presidentit të parë të Republikës së Kosovës, themeluesit dhe liderit të Lidhjes Demokratike të Kosovës , njeriut që i priu Kosovës në ditët më të rënda të historisë së saj.

　

“Rugova mjeshtri i artit poetik dhe dijetari doli në ballë të popullit të Kosovës në orët më të liga të historisë së re të kësaj pjese të Evropës”, tha Mustafa duke kujtuar janarin e vitit 2006, kur presidenti i atëhershëm i SHBA-ve, Gjorgj W Bush në letrën ngushëlluese për familjen Rugova, duke thënë se SHBA-të humbën një mik të vërtetë.

　

“Gjatë ditëve të konfliktit Rugova ishte zëri i arsyes dhe i maturisë që i ndihmoi popullit të Kosovës për të bërë themelet e një të ardhme paqësore. Urtësia dhe vizioni e shndërruan presidentit Rugova në një personalitet të respektuar kudo në botë”, tha Mustafa.

　

Finalizimi i shtatores së presidentin Ibrahim Rogova ka kushtuar 135 mijë euro, ndërsa është punuar në Tiranë.

　

Dr. Ibrahim Rugova lindi më 2 dhjetor të vitit 1944 në fshatin Cerrcë, komuna e Istogut. Më 10 janar 1945 komunistët jugosllavë ia pushkatuan të atin, Ukën dhe gjyshin Rrustë Rugova.

　

Ai doktoroi në fushën e letërsisë në Universitetin e Prishtinës, më 1984, ndërsa në vitin 1988 u zgjodh kryetar i Shoqatës së Shkrimtarëve të Kosovës.

　

Më 23 dhjetor 1989 Rugova u zgjodh kryetar i Lidhjes Demokratike të Kosovës, partisë së parë politike në Kosovë që sfidoi drejtpërdrejt regjimin komunist në fuqi. LDK, nën udhëheqjen e Ibrahim Rugovës, u bë shpejt forca politike prijëse në Kosovë, duke mbledhur shumicën e popullit rreth vetes.

　

Ibrahim Rugova i priu politikës shqiptare gjatë shembjes së Jugosllavisë, ndërsa për shkak të politikës paqësore që zgjodhi mori epitetin “Gandi i Ballkanit. Pas luftës në Kosovë partia e tij LDK firoi zgjedhjet, ndërsa Rugova dy herë u zgjedh president i Kosovës.

　

Rugova vdiq me 21 janar 2006, ndërsa u varros me nderime te larta shtetërore dhe ushtarake.

---