Sa paguhen shefat e kompanive të sigurimeve shëndetësore?

(KEYSTONE/Christian Beutler)

Primet shëndetësore janë rritur dukshëm kohët e fundit. Një rritje tjetër pritet të ndodhë edhe në vjeshtë dhe zviceranët po kursejnë gjithnjë e më shumë për shkak të shpenzimeve të sigurimit shëndetësor, qirasë dhe inflacionit, shkruan 20minuten.

Përkundër kësaj, pagat e shefave të kompanive të sigurimeve shëndetësore po rriten, në disa raste në mënyrë të konsiderueshme. Përfituesi më i mirë, Andreas Schönenberger, mori 956,486 CHF nga Sanitas vitin e kaluar. Kjo është dy herë më shumë se sa Sanitas pagoi paraardhësin e tij pesë vjet më parë, siç tregon analiza e raporteve vjetore të “CH Media”, përcjell albinfo.ch.

Drejtori i Groupe Mutuel, Thomas Boyer, gjithashtu mori 50 për qind më shumë pagë se pesë vjet më parë.

Për shkak të këtyre rritjeve të pagave, politikanët tani duan të reagojnë. Pas disa përpjekjeve të dështuara, Komisioni i Shëndetësisë në Këshillin e Shteteve miratoi të hënën një nismë parlamentare nga këshilltari kombëtar i PS-së, Baptiste Hurni. Iniciativën e pranoi edhe Këshilli Kombëtar, shkruan 20minuten.

Këshilli i Shteteve është kundër kufirit të pagës prej 250,000 CHF që kërkohet në nismë. Por tani komisioni simotër në Këshillin Kombëtar do të vendosë një kufi të sipërm të pagave për drejtuesit dhe bordet e drejtorëve të kompanive të sigurimeve shëndetësore.