Sa persona humbën jetën si pasojë e aksidenteve ajrore

Vetëm vitet 2013 dhe 2017 ishin më të sigurtit për aviacionin që nga Lufta e Dytë Botërore

Numri i vdekjeve totale si pasojë e aksidenteve të aviacionit në vitin 2019 ishte 293 viktima, sipas të dhënave paraprake, duke e bërë atë vitin e tretë më të sigurt.

Qendra e Vlerësimit të të Dhënave të Përplasjeve të Avionëve (JACDEC) me qendër në Gjermani raportoi se më shumë se gjysma e vdekjeve ndodhi më 10 mars në përplasjen e një avioni të linjës ajrore të Etiopisë, tip “Boeing 737 MAX 8” ku vdiqën 157 persona.

Kjo ishte përplasja e dytë vdekjeprurëse e një avioni “737 MAX” në më pak se gjashtë muaj, gjë që çoi në ndalimin e operacioneve mbarëbotërore të tij, transmeton ATSH.

JACDEC deklaroi se katastrofa që ndodhi në muajin mars ishte diçka e rrallë dhe theksoi se në vitin 2019 vdiqën 48% persona më pak krahasuar me një vit më parë, kur humbën jetën 559 persona, përcjell albinfo.ch.

Sipas JACDE, vetëm vitet 2013 dhe 2017 ishin më të sigurtit për aviacionin që nga Lufta e Dytë Botërore.

---