Së shpejti e gatshme shtatorja e Rugovës

Shtatorja do të vendoset në sheshin që mban emrin e Ibrahim Rugovës, përballë ndërtesës së Kuvendit të Kosovës

Artistët më të mëdhenj të skulpturës po punojnë në vijimësi për ta finalizuar shtatoren gjigante të ish presidentit Ibrahim Rugova. Kjo shtatore do ta “ringjallë”, njërin nga drejtuesi politik të lëvizjes paqësore në Kosovë, Dr. Rugovën.

Shtatorja e së shpejti do të jetë e gatshme dhe do të vendoset në sheshin që mban emrin e tij, përballë ndërtesës së Kuvendit të Kosovës.

“Artistë të mëdhenj po punojnë në finalizimin e saj. Përmasat dhe realizimi i shtatores janë impresionuese”, ka shkruar në rrjetin social facebook, nënkryetari i Kuvendit Komunal të Prishtinës, Avdullah Hoti, raporton “Koha”,

Ai është i sigurt se të gjithë, në veçanti ata që e kanë njohur nga afër presidentin Rugova, do të mahniten me madhështinë e kësaj shtatoreje.

“Me kalimin e kohës, përmasat e personalitetit të Presidentit Rugova vijnë duke u rritur”, ka shkruar Hoti, duke mos dhënë sqarime shtesë sa do të jetë e madhe shtatorja dhe cili nga skulptorët e ka fituar tenderin ndërkombëtarë.