Sekretari amerikan i Shtetit: Sa të ekzistojë SHBA-ja, Izraeli nuk do të mbrohet i vetëm

Blinken

Sekretari amerikan i Shtetit, Antony Blinken, në vizitën e sotme në Tel Aviv, ka thënë se përderisa të ekzistojnë Shtetet e Bashkuara të Amerikës, Izraeli nuk do të mbrohet kurrë i vetëm.

Ai shprehu mirënjohjen për kthimin në Izrael, për siç tha ai, “në një moment shumë të vështirë për gjithë botën”.

“Është e pamundur për mua që të shikoj fotot e familjeve që janë vrarë dhe të mos mendoj për fëmijët e mi. Foshnjat e masakruara, trupat e përdhosur, të rinjtë e djegur të gjallë, gratë e dhunuara, prindërit e ekzekutuar në sy të fëmijëve, fëmijët në sy të prindërve. Si mund ta kuptojmë këtë?”, ka thënë ai.

Ndër të tjera, sekretari amerikan u shpreh se Izraeli nuk do të luftojë kurrë vetëm, përcjell albinfo.ch.

“Mesazhi që unë i sjell Izraelit është ky: ju mund të jeni mjaftueshëm të fortë për të mbrojtur veten tuaj, por për sa kohë që Amerika ekziston, nuk do t’ju duhet kurrë”, ka thënë Blinken.

Antony Blinken u shpreh se Hamasi ka vetëm një synim, që është zhdukja e Izraelit dhe hebrenjve.