Sektori privat në borxhe

Të dhënat për vitin 2011, të publikuara ditë më parë nga BQK-ja, tregojnë se borxhi i jashtëm i Kosovës arriti vlerën 1.4 miliardë euro

Vetëm në sektorin privat, borxhet e jashtme kapin vlerën prej 1 miliard e 106 milionë euro.

Kjo hyrje në borxhe, sipas ekspertëve të çështjeve ekonomike, përveç tjerash, ka ndodhur edhe për shkak se normat e interesit në bankat komerciale që veprojnë në Kosovë janë tejet të larta.

Eksperti i çështjeve ekonomike në Institutin “Riinvest”, Alban Zogaj ka deklaruar për Radio Evropa e Lirë se çdo mundësi e marrjes së fondeve jashtë Kosovës është më e lirë se sa brenda Kosovës.

Sipas tij, kjo hyrje në borxhe nënkupton investim në Kosovë, dhe çdo investim në vend ndikon në zhvillim ekonomik.

Por, ndryshe nga Zogaj, shprehet eksperti i çështjeve ekonomike, njëherazi ish ministër i Ekonomisë dhe Financave, Haki Shatri.

Ai thotë se hyrja e sektorit privat në borxhe të jashtme mund të rrezikojë ekonominë e vendit, në rast se bizneset nuk janë në gjendje të kryejnë likuiditetin dhe detyrimet ndaj borxhlinjve. 

Edhe Shatri thekson se ajo çfarë e ka bërë sektorin privat të hyjë në borxhe të jashtme, është kamata e lartë në Kosovë, e cila, siç thotë Shatri, për ekonominë e Kosovës është e papërballueshme.

Por, çfarëdo qofshin borxhet, thekson Shatri, ato mund ta dërgojnë vendin në krizë ekonomike dhe sociale.