Serbët kërcënojnë përmes “Deklaratës së Vidovdanit”

Keystone EPA/GEORGI LICOVSKI

Qytetarët serbë të mbledhur në Mitrovicën e Veriut dhe në Graçanicë kanë paraqitur një dokument të quajtur “Deklarata e Vidovdanit”, ku thuhet se komuniteti serb në Kosovë është “i ekspozuar ndaj dhunës”, shkruan Radio Evropa e Lirë.

Për këtë, serbët përmenden arrestimin e disa qytetarëve serbë, nën dyshimet për sulme ndaj misionit të NATO-s, KFOR, policisë dhe gazetarëve.

Tutje, thuhet se nëse Prishtina vazhdon me aktivitetet dhe arrestimet e saj, serbët në Kosovë do të detyrohen t’u përgjigjen “të gjithë atyre që na dëshirojnë të keqen, që ëndërrojnë luftën në vend të paqes”, përcjell albinfo.ch.

“Ne do të jemi të bashkuar në luftën tonë të drejtë për të qëndruar dhe mbijetuar në këto zona dhe për të mbrojtur shtëpitë dhe familjet tona”, thuhet në dokument.

Në “Deklaratën e Vidovdanit” përmendet edhe Asociacioni i komunave me shumicë serbe në Kosovë. “Ka ardhur koha që të zbardhet e vërteta dhe të thuhet qartë në këtë Vidovdan: a do të kemi Asociacion? Ndryshe, e dimë çfarë të bëjmë”, thekson deklarata, pa specifikuar më shumë, përcjell albinfo.ch.