Serbët pajisen me dokumente të Kosovës

Sipas MPB-së, deri në muajin e kaluar 43 mijë e 637 serbë të Republikës së Kosovës kanë aplikuar për tu pajisur me letërnjoftime RKS

Më shumë se 40 mijë serbë të Kosovës kanë marrë dokumente  identifikuese të Republikës së Kosovës, duke e pranuar  shtetin e pavarur. Këto shifra i ka publikuar portali IO, marrë nga të gjitha qendrat e Kosovës e që janë konfirmuar edhe nga zyra për marrëdhënie me publikun në Ministrinë e Punëve të Brendshme.Sipas MPB-së, deri në muajin e kaluar 43 mijë e 637 serbë të Republikës së Kosovës kanë aplikuar për tu pajisur me letërnjoftim, ndërsa janë 2 mijë e 124 serbë të cilët kanë parashtruar kërkesën për t’u pajisur me Pasaporta të RKS-së.

“Duhet të theksojmë që gati çdo vit është duke u shtuar interesimi nga qytetarët e nacionalitetit serb për t’u pajisur me dokumente të Republikës së Kosovës dhe nga viti në vit vërehet një shtim i kërkesave për t’u pajisur me dokumente”,kanë thënë për IO zyrtarë të MPB-së.Ky numër është shtuar kohën e fundit, pasi që institucionet e Kosovës aplikuan masën ndëshkuese për veturat me targa të vjetra të ish Jugosllavisë. Serbët që kanë lëvizur me këto targa kanë qenë të detyruar që automjetet e tyre t’i regjistrojnë në KS ose RKS. Ndërsa regjistrimi ka qenë i pamundur pa letërnjoftim të Republikës së Kosovës.Përmes kësaj praktike, Prishtina zyrtare i ka obliguar në një mënyrë të gjitha serbët që jetojnë në Kosovë, që të pajisen me dokumente të Kosovës, e ne këtë mënyrë të bëhen edhe taksapagues të këtij shteti, që nuk njihet nga Serbia.