Kosova

Serbëve të veriut u kërkohet ta paguajnë rrymën

Qytetarët e katër komunave veriore të Kosovës, Leposaviqi, Mitrovicë Veriore, Zubin Potok dhe Zveçan që nga viti 1999 nuk kanë paguar faturat e shpenzuara të energjisë elektrike

E hënë, 7 Qershor 2021 - 20:50 albinfo.ch

Shefi i zyrës së Bashkimit Evropian në Kosovë, Tomas Szunyog, gjatë vizitës në Mitrovicën Veriore ka bërë të ditur se energjia elektrike duhet paguar nga të gjithë qytetarët e Republikës së Kosovës.

Sipas tij, pagesa e rrymës elektrike është një çështje normale, pasi që pagesa e tatimit është obligim i çdo qytetari.

Szunyog, përveç tjerash ka deklaruar se zyra e BE-së në Kosovë është duke punuar me të dy palët për ta zgjidhur problemin e energjisë elektrike në Kosovë.

“Sa i përket energjisë elektrike, mendoj që është mirë të gjendet një zgjidhje e qëndrueshme sa më parë të jetë e mundur, e cila në njërën anë do të siguronte furnizim të qëndrueshëm me energji elektrike dhe, në anën tjetër, të paguhet për të, sepse kjo është diçka krejt normale për njerëzit që t’i përmbushin obligimet tatimore, ne po punojmë me të gjitha palët që ta arrijmë këtë zgjidhje dhe besoj se jemi në rrugën e duhur”, ka deklaruar ai, përcjell Albinfo.ch.

Më gjashtë majë të këtij viti Kuvendi i Kosovës kishte miratuar me 61 vota pro rekomandimin e Komisionit për Ekonomi, Industri, Ndërmarrësi dhe Tregti lidhur me kërkesën e ‘NP KOSTT’ për sigurimin e mjeteve financiare për mbulimin e humbjeve në pjesën veriore të Kosovës.

Operatori i Sistemit, Transmisionit dhe Tregut (KOSTT) kishte hyrë në obligime financiare prej 11 milionë eurosh për prodhim të energjisë në veri të Mitrovicës.

Qytetarët e katër komunave veriore të Kosovës, Leposaviqi, Mitrovicë Veriore, Zubin Potok dhe Zveçan që nga viti 1999 nuk kanë paguar faturat e shpenzuara të energjisë elektrike.

Ambasadori Tomas Szunyog, gjatë ditës së hënë ka vizituar Mitrovicën Veriore, me ç’rast ka shpërndarë tetë kamionë për grumbullimin e mbeturinave.

Kamionët në fjalë kanë kushtuar 700 mijë euro dhe janë financuar nga ana e BE-së, si pjesë e projektit për menaxhimin e mbeturinave.