Serbia fajësohet për vrasjen e 16 civilëve shqiptarë

Fondi për të Drejtën Humanitare në Serbi që drejtohet nga Natasha Kandiq, thotë se një gjykatë në Beograd e bën përgjegjëse shtetin e Serbisë për krimet e kryera në Kosovë

Shteti i Serbisë për herë të parë ka pranuar fajin se forcat e tyre kanë vrarë në Kosovë 16 civilë, në mesin e tyre, fëmijë, gra dhe pleq. Për këto vrasje makabre, Gjykata Themelore e Beogradit ka ndarë një shumë prej 210 mijë eurosh (25.9 milionë dinarë) si dësmshpërblim për familjet e dëmtuara, Bogujevci, Gashi e Duriqi.

Por familja Bogujevci nga Podujeva që ka humbur më të dashurit e tyre, nuk e pranon këtë dëmshpërblim duke  konsideruar ofendim.

E mbijetuara e masakrës së familjes Bogujevci, Saranda, të cilës ia vranë gjyshen, nënën, dy vëllezërit e familjarë të tjerë, ka thënë se nuk po e pranon dëmshpërblimin. Për këtë krim janë dënuar gjashtë ish-pjesëtarë të njësitit “Shkorpionët” të Ministrisë së Punëve të Brendshme të Serbisë.

Fondi për të Drejtën Humanitare në Serbi që drejtohet nga Natasha Kandiq, ka dalë me një komunikatë për opinionin, sipas të cilës, një gjykatë në Beograd ka sjellë aktgjykimin e parë, i cili drejtpërdrejt e bën përgjegjëse shtetin e Serbisë për krimet e kryera në Kosovë.

Në këtë mënyrë, Gjykata e Parë Themelore në Beograd ka bërë përgjegjëse shtetin e Serbisë për vrasjen e anëtarëve të familjeve Bogujevci, Duriqi e Gashi, para shtëpisë së familjes Gashi në Podujevë, në marsin e vitit 1999. Krimin, sipas kësaj gjykate, e kanë kryer pjesëtarët e njësisë së ashtuquajtur “Shkorpionët” të MUP-it të Serbisë, e cila ka vepruar gjatë luftës në rajonin e Llapit.

Fondi për të Drejtën Humanitare, vlerëson, se “gjykata ka sjellë vendim të drejtë, dhe se në procesin e shkallës së dytë, për shkak të natyrës së rastit, gjykata duhet që shumën e dëmshpërblimit ta harmonizojë me standardet e Gjykatës Evropiane për të drejtat e njeriut për raste të ngjashme.