Serbia kthen në kufi boksierët nga Kosova, Shqipëria tërhiqet nga garat

Pa Kosovë nuk ka Shqipëri. Kjo u konfirmua edhe së fundmi, përpara Kampionatit Botëror të boksit amator që do të zhvillohet në Beograd. Në kufi u regjistrua një incident i turpshëm, ku autoritetet serbe nuk lejonin përfaqësuesen e boksit të Kosovës të kalonte me stemat dhe logot në uniformat sportive.

Drejtuesit e skuadrës Dardane nuk e pranuan urdhërin për të hequr simbolet, teksa për ngjarjen informuan edhe Federatën Ndërkombëtare, raporton A2 përcjell Albinfo.ch.

Në situatën e krijuar, edhe Shqipëria refuzoi të marrë pjesë në Botërorin e boksit amator, duke njoftuar se prezenca e kuqezinjve lidhet vetëm me pjesëmarrjen me të drejta të plota të Kosovës. Kjo u konfirmua nga trajneri Besim Brahimi, i cili falënderoi publikisht trajnerin e mirënjohur të Shqipërisë, Zef Gjoni.