Serbia në zgjedhje të jashtëzakonshme

Partia Progresive Serbe (PPS) e ka mbështetur propozimin e lideri të saj, Aleksandër Vuçiq që në Serbi të mbahen zgjedhjet e jashtëzakonshme në muajin mars

Partia më e madhe parlamentare në Serbi, Partisë Progresive Serbe (PPS) ka miratuar kërkesën e kryetarit të kësaj partie, Aleksandër Vuçiq, për mbajtjen e zgjedhjeve të jashtëzakonshme në Serbi. Sipas kësaj partie, zgjedhjet në Serbi do të mbahen në mesin e muajit mars.

 

Vuçiq, njëherësh zëvendëskryeministër i parë i qeverisë së Serbisë, tha se udhëheqja partiake në mënyrë unanime e ka mbështetur propozimin e tij, që në Serbi të mbahen zgjedhjet e jashtëzakonshme.

 

“Propozimi im është për ta parë vullnetin e popullit”, tha Vuçiq, në takimin Kryesisë së Partisë në Beograd, dhe kërkoi që zgjedhjet të organizohen më 16 mars, transmeton REL. “Ka ardhur koha që të paraqesim se çka kemi bërë gjatë kohës së kaluar”, deklaroi Vuçiq.

 

Pritet që presidenti i Serbisë, Tomislav Nikoliq, që gjithashtu vjen nga kjo parti, të shpërndajë Kuvendine  Serbisë dhe mnjehr t’i shpallë zgjedhjet e jashtëzakonshme.

Vendimi për zgjedhje në Serbia ka ardhur pas përplasjes së partive të koalicionit, PPS-së së Tomisllav Nikoliqit dhe SPS të kryeministrit Ivica Daçiq. Thyerja ka ndodhur kryesisht pasi Daçiq së bashku me kryeministrin e Kosovës, Hashim Thaçi, u propozuan për çmimin nobel nga një grup kongresmenësh amerikanë.

 

Presidenti Nikoliq, tha se ky çmim nuk i bën nderë Serbisë, prandaj propozoi një kryeministër tjetër për Serbinë.

 

Megjithatë zgjedhjet e jashtëzakonshme në Serbi kanë ngjallë reagime edhe në Kosovë. Nuk dihet nëse në zgjedhje do të marrin pjesë edhe serbët e Kosovës, sikurse herëve të tjera. Zëvendëskryeministri Vuçiq nuk ka precizuar nëse edhe serbët e Kosovës do të marrin pjesë në zgjedhje, por ka thënë e procesi do të jetë i njëjtë sikurse herëve të tjera.

 

Ndërsa, Bekim Çollaku, këshilltar politik i kryeministrit të Kosovës, Hashim Thaçi, ka thënë për “Koha” se Serbia nuk do të organizojë zgjedhje edhe në Kosovë.

 

“Serbia nuk mund të organizojë asnjë lloj zgjedhjesh në Kosovë. Mirëpo, qytetarët e Kosovës të komunitetit serb që kanë dyshtetësi kanë të drejtë të votojnë në zgjedhjet parlamentare të Kosovës dhe ato të Serbisë. Kjo gjë është legale për të gjithë qytetarët e Kosovës që kanë dyshtetësi”, ka thënë Çollaku.

---