Serbia thotë se 4 policë të Kosovës janë ndaluar, njëri prej tyre zëvendësdrejtor

Ministria e Punëve të Brendshme të Serbisë ka thënë se janë ndaluar katër policë të Kosovës, dhe njëri prej tyre është dërguar në mbajtje, përcjell albinfo.ch.

Ka konfirmuar se njëri prej të ndaluarve është zëvendësdrejtori i Policisë, Dejan Jankoviq.

“Katër pjesëtarë të Policisë së Kosovës janë ndaluar, nga të cilët njëri është në mbajtje – zëvendësdrejtor i Policisë së Kosovës”, thuhet në deklaratën e Ministrisë së Serbisë, transmeton “B92”.

Ministria ndalimin e qindra kosovarëve në pikat kufitare të Serbisë e ka arsyetuar me “kontrolle të shtuara të sigurisë për ta rritur sigurinë e qytetarëve”.

Ministria e Punëve të Brendshme të Kosovës, ka sqaruar në një postim të mbrëmshëm se janë ndaluar fillimisht 10 policë të Kosovës, e më pas pesë prej tyre janë liruar e pesë janë në mbajtje, përfshirë edhe zëvendësdrejtorin Jankoviq.

Për këtë çështje ka reaguar presidentja Vjosa Osmani e kryeministri Albin Kurti.