Sërish protestë kundër rastit “Monstra”

Protesta filloi pak para orës 14, ndërsa ndryshe nga herët e tjera, sot u vërejt një numër më i vogël i protestuesve. Protesta përfundoi e qetë

Qindra shqiptarë kanë protestuar të premten në Shkup, kundër dënimeve për rastin Monstra. Marshi protestues nisi nga qendra tregtare “Çairçanja” për të përfundur e qetë afër qendrës tregtare “Mavrovasja”, ku kanë qenë të stacionuar një numër i madh i forcave policore.

Protesta filloi pak para orës 14, ndërsa ndryshe nga herët e tjera, sot u vërejt një numër më i vogël i protestuesve.

Protesta e qetë kësaj radhe udhëhiqej nga Këshilli Organizativ i kryesuar nga familjarët e të dënuarve. Kryetari i Këshillit, Bedri Ajdari theksoi se numri i vogël i protestuesve krahasuar me javët e kaluara, është pasojë e presioneve nga pushteti maqedonas.

Protestat sërish i përkrahën figura të ndryshme të jetës politike dhe publike, ndërsa sërish ishte i  pranishëm kryetari i Komunës së Strugës, Ziadin Sela dhe ish deputeti Hisni Shaqiri.

Protestuesit mbanin flamuj kombëtar dhe pankaratat “Duam Drejtësi”, “Respektoni faktet”, “Stop diskriminimit”, “Ku i kalon pushimet Ali Ahmeti e Menduh Thaçi?”, “Gordana terroriste”, “UÇK nuk është terroriste”, etj. Por gjithashtu janë dëgjuar edhe brohoritje dhe parulla kundër diskriminimit dhe drejtësisë selektive ndaj shqiptarëve.

Këshilli Organizativ ripërsëriti kërkesat e protestuesve për shpalljen e pafajshëm të  dënuarit për rastin Monstra dhe lirimin e tyre, shkarkimin e prokurores dhe gjykatësit të rastit, dhe dorëheqjen e ministres së Punëve të Brendshme, Gordana Jankullovska.

Këshilli Organizativ i Protestës kërkoi po ashtu lirimin e menjëhershëm të gjithë të arrestuarve në protestat në Shkup dhe Tetovë, derisa nuk plotësohen këto kërkesa protestat nuk do të ndërpriten.