SHBA: Afro 90 të vdekur, shkak – moti i keq

(KEYSTONE/Michael Buholzer)

Në Shtetet e Bashkuara të Amerikës janë regjistruar afro 90 të vdekur, pasi vendi u godit javën e kaluar me stuhi të fuqishme dimërore.

Numri më i madh i viktimave u shënua në Tennessy, 25 dhe 16 të tjerë në Oregon, ku vazhdon të mbetet në fuqi gjendja e emergjencës pas ngricave e akullit nëpër rrugë, që pritet të vazhdojnë të paktën deri të mërkurën, transmeton albinfo.ch.

Sipas Associated Press, dhjetëra mijëra njerëz mbeten gjithashtu pa energji elektrike në pjesë të mëdha të vendit.

Në Portland, tre persona kanë vdekur pasi janë goditur nga rryma elektrike kur erërat e fuqishme shkaktuan këputjen dhe rënien e një kablli të tensionit të lartë mbi automjetin me të cilin ata po udhëtonin.

Pesë persona, prej të cilëve konsiderohet se shumica ishin të pastrehë, kanë vdekur vetëm gjatë katër ditëve në Seattle.