SHBA-ja fut në listën e sanksioneve ish-drejtorin e prokurimit në Ministrinë e Infrastrukturës

Shtetet e Bashkuara të Amerikës e kanë futur  ish-drejtorin e Departamentit të Prokurimit në Ministrinë e Tregtisë dhe Industrisë së Kosovës, Nexhat Krasniqi, në listën e personave si përgjithësisht të papërshtatshëm për hyrje në SHBA.

Sipas njoftimit, vendimi vjen “për shkak të përfshirjes së tij në korrupsion të madh”, përcjell albinfo.ch.

“Si zyrtar publik përgjegjës për mbikëqyrjen e kontratave të prokurimit, Krasniqi ka keqpërdorur pozitën e tij publike duke pranuar ryshfet në këmbim të dhënies së kontratës për lejimin e ndërtimit të parkut industrial në komunën e Drenasit nga kompania operuese ‘Eltoni’. Veprimi i sotëm tregon se Shtetet e Bashkuara qëndrojnë me ata në Kosovë që kërkojnë llogari nga zyrtarët publikë të korruptuar. Ky përcaktim ripohon përkushtimin e SHBA-së për të luftuar korrupsionin, i cili dëmton interesin publik, pengon prosperitetin ekonomik të vendeve dhe pakëson aftësinë e qeverive për t’iu përgjigjur në mënyrë efektive nevojave të njerëzve të tyre”, ka thënë zëdhënësi i Departamentit të Shtetit të SHBA-së, Matthew Miller.

Ndryshe, departamenti ka caktuar edhe fëmijët e Krasniqit, si përgjithësisht të papërshtatshëm për hyrje në Shtetet e Bashkuara të Amerikës.