Ndalimi kombëtar i fluturimeve në Shtetet e Bashkuara të Amerikës është hequr pas gati pesë orësh, duke u mundësuar aeroporteve të rifillojnë operacionet e tyre. Megjithatë, rikthimi i trafikut ajror nuk nënkupton normalizim të menjëhershëm të situatës, pasi shumë fluturime të shtyra kanë krijuar ngarkesë të madhe në aeroporte, përcjell albinfo.ch.
Sekretari amerikan i Transportit, Sean Duffy, dhe sekretari i Sigurisë Kombëtare, Markwayne Mullin, dolën në një konferencë për media për të shpjeguar arsyet që çuan në marrjen e këtij vendimi të jashtëzakonshëm.
Sipas zyrtarëve amerikanë, ndërprerja u shkaktua nga të dhënat jokonsistente që transmetoheshin përmes pajisjeve të vjetruara të sistemit të kontrollit të trafikut ajror.
Duffy kritikoi gjendjen e infrastrukturës aktuale, duke ia atribuar problemet mungesës së investimeve dhe financimit nga Kongresi amerikan. Ai kërkoi 50 miliardë dollarë për ndërtimin e një sistemi të ri të kontrollit të trafikut ajror, të pajisur me teknologji moderne.
Nga ana tjetër, Mullin hodhi poshtë mundësinë që ndërprerja të ishte shkaktuar nga një sulm kibernetik apo të kishte lidhje me problemet teknike që Microsoft kishte përjetuar një ditë më parë. Ai gjithashtu siguroi se gjatë gjithë situatës nuk ishte rrezikuar jeta e askujt.
Ky është rasti i dytë i një ndalimi kombëtar të fluturimeve në SHBA që nga sulmet terroriste të 11 shtatorit 2001, por konsiderohet më i gjati i këtij lloji që nga ajo kohë.
Ndërkohë, përfaqësues të të dyja kampeve politike kanë kërkuar nisjen e një hetimi për të zbardhur plotësisht shkaqet dhe rrethanat e incidentit të së premtes në mbrëmje. Qëllimi është identifikimi i përgjegjësive dhe marrja e masave që një ndërprerje e tillë e trafikut ajror të mos përsëritet në të ardhmen./Albinfo.ch
