SHBA: Kosova dhe Serbia t’i marrin seriozisht obligimet nga Marrëveshja për normalizim

Shtetet e Bashkuara të Amerikës, një ditë para takimit në Bruksel, kanë kërkuar nga Kosova dhe Serbia t’i marrin seriozisht obligimet e tyre që dalin nga Marrëveshja për normalizimin e raporteve.

Për REL, Ambasada amerikane në Prishtinë ka thënë se në mesin e obligimeve përfshihet edhe themelimi i Asociacionit të komunave me shumicë serbe, përcjell albinfo.ch.

“Ne i kërkojmë Kosovës dhe Serbisë që të marrin seriozisht obligimet e tyre që dalin nga Marrëveshje për normalizim, të cilët e kanë arritur më herët gjatë këtij viti dhe të nisin të lëvizin përpara edhe në obligimet ekzistuese dhe të mëhershme të dialogut dhe të Marrëveshjes së Ohrit, përfshirë themelimin e Asociacionit të komunave me shumicë serbe”, u tha në përgjigje të Ambasadës amerikane.

Kryeministri i Kosovës, Albin Kurti, dhe presidenti i Serbisë, Aleksandar Vuçiq, më 14 shtator do të takohen në Bruksel, në kuadër të dialogut për normalizimin e raporteve.

Në anën tjetër, nga ambasada kanë thënë se SHBA-ja vazhdon “ta mbështesë fuqishëm dialogun e ndërmjetësuar nga BE-ja si një mënyrë për të arritur raporte paqësore dhe produktive mes Kosovës dhe Serbisë”.

Ndryshe, sipas agjendës së paralajmëruar, Kurti dhe Vuçiq do të diskutojnë për zbatimin e Marrëveshjes drejt normalizimit të raporteve, por edhe për çështje aktuale.