Shënohet 50 vjetori i vdekjes së Yuri Gagarin

Rusia ka nderuar të martën, njeriun e parë në hapësirë, Yury Gagarin, i cili vdiq tragjikisht para 50 vjetësh.

Gagarin ishte vetëm 27-vjeçar kur më 12 prill 1961 ia doli të arrinte në orbitë, me raketën e tij Vostok 1, përcjell albinfo.ch.

Kapsula e tij ka udhëtuar me shpejtësi prej 27.400 kilometra në orë dhe qëndroi në orbitë për 108 minuta. Me t’u kthyer në tokë, Gagarin arriti famë ndërkombëtare dhe ishte shpallur hero kombëtar.

Shtatë vjet pas kthimit të sigurt nga hapësira, Gagarin vdiq gjatë një fluturimi testues bashkë me instruktorin e tij Vladimir Seryogin në rajonin Vladimir, ku edhe ndodhet memoriali i tij.

“Gagarin dhe Seryogin ishin njerëz, ne i kujtojmë të atillë me pika të dobëta e të forta të njerëzve. Por, për ne janë edhe heronj. Dhe përgjegjësia jonë e vetme është qe t’i kujtojmë, t’i nderojmë dhe të vazhdojmë punën e tyre për atdheun tonë”, tha përfaqësuesi i presidentit rus Nikolai Ovisjenko.

Përpos që është hero kombëtar Gagarin është fitues edhe i shumë medaljeve tjera.