Shërbimi sekret na çoi në Kumanovë, dhe na vrau

“Na thirrën në lagje e pastaj na tradhtuan për të shpëtuar kokat e tyre”, kështu deklaroi Nasuf Beqiri njëri prej të akuzuarve të grupit të Kumanovës gjatë rifillimit të gjykimit

Ngjarja në “Lagjen e Trimave” në Kumanovë ishte e inskenuar nga shërbimi sekret maqedonas dhe nga politika në Shkup, për ta shpëtuar vetëm dhe për t’i likuiduar disa shqiptarë. Kështu kanë deklaruar gjatë gjykimi disa nga pjesëmarrësit në luftimet e Kumanovës në maj të vitit të kaluar.

“Na thirrën në lagje e pastaj na tradhtuan për të shpëtuar kokat e tyre”, kështu deklaroi Nasuf Beqiri njëri prej të akuzuarve të grupit të Kumanovës gjatë rifillimit të gjykimit.

“Ky është një skenar i inskenuar nga politikanët. Por plani u doli huq. Po shkojnë thellë e më thellë. Ne kemi shumë gjëra për të treguar por do t’ia lëmë kohës. Kërkojmë që këtë rast ta marrë Prokuroria Speciale. Kërkojmë intervenimin edhe të faktorit ndërkombëtar, ka deklaruar Beqiri.

Në bankën e të akuzuarve tashmë rrinin 37 persona, tetë prej të cilëve se fundmi u akuzuan për logjistikë të grupit. Grupi kosovar i luftëtarëve njëzëri mohoi përfshirje të 8 personave në logjistikë dhe kërkoi që ti lirojnë. Ata thanë se në këtë siç e quanin orkestrim kanë gisht edhe persona nga shërbimi sekret.

Ndërsa, prokurori Naum Panovski beson se kanë prova të mjaftueshme se grupi i ka kryer veprat për të cilat ngarkohet, dhe se logjistika është kryer nga 8 të akuzuarit e fundit. Por avokatët kundërshtuan këto përkufizime duke siguruar qe të akuzuarit e logjistikës nuk janë njohur më parë me grupin e armatosur.

Sipas agjencisë së lajmeve “meta”, njëri nga të akuzuarit, Demë Shehu, ka deklaruar se tragjedia e 9 majit ka arkitekt, dhe e gjithë kjo është bërë për para, duke theksuar se në ”Lagjen e Trimave” kanë qëndruar plot 6 ditë, dhe askush nuk është ankuar, as shqiptarët, e as maqedonasit. Kjo dëshmi është dhënë si plotësim ndaj deklaratës së avokatit të tij mbrojtës, citon fax.al.

Ndërkaq, i akuzuari tjetër, Hamdi Krasniqi, gjithashtu, si plotësim ndaj deklaratës së avokatit të tij mbrojtës, ka deklaruar se akuza është qesharake, duke shtuar se as ai, e as Sami Ukshini, nuk janë organizatorë të grupit, ndërkaq në shtëpitë e lagjes nuk kanë hyrë me dhunë.

Njëri nga avokatët mbrojtës, Shasivar Iseni, ka deklaruar se vetëm në Maqedoni, është e lejuar që organi paditës, të bëjë shqyrtim dhe analizim faktesh, që i ka mbledhur vetë. Seanca ka nisur pas disa shtyrjeve. në Kumanovë me 9 dhe 10 maj 2015, u zhvillua një konflikt i armatosur ndërmjet një grupi shqiptarësh dhe forcat policore maqedonase. 18 veta u vranë dhe dhjetëra të tjerë u plagosën, transmeton Albinfo.Ch.