SHKA “Dardania” nga Zvicra merë pjesë në “Hasi Jehon”

Shoqëria Kulturore Artistike "Dardania" nga Zvicra, merë pjesë në Festivalin tradicional folklorik "Hasi Jehon"

Shoqëria Kulturore Artistike “Dardania” nga Zvicra do të performojë në natën finale të Festivalin tradicional folklorik “Hasi Jehon”.

Drejtuesit e festivalit kanë deklaruar se kanë finalizuar përgatitjet për edicionin e 23-të të kësaj ngjarjeje kulturore, që sivjet mbahet nga 2 deri më 4 maj, në fshatin Gjonaj të Prizrenit. Në këtë manifestim të valleve dhe këngëve burimore shqiptare, sipas udhëheqësve të shoqërisë kulturore artistike “Malësori”, në konkurrencën garuese do të paraqiten rreth 20 shoqëri kulturo-artistike nga trojet shqiptare dhe nga mërgata.

“E veçanta e këtij edicioni është se mbahet nën ombrellën e 100- vjetorit të pavarësisë së Shqipërisë, ku në fokus do të jetë paraqitja e folklorit shqiptar, që është ruajtur dhe vazhdon të kultivohet në të gjitha trevat shqiptare”, ka thënë drejtori i festivalit, Haziz Hodaj.

Ai ka bërë të ditur se festivali hapet të mërkurën mbrëma me ekspozitat e fotografive të SHKA “Malësori” dhe piktores Kurbina Çollaku, për të vijuar me paraqitjen e pesë SHKA-ve dhe grupeve artistike nga Kosova dhe rapsodëve nga Mirdita e Shqipërisë, ndërkohë që do të interpretojnë edhe dy këngëtarë mysafirë dhe një poete. Në natën e dytë në skenën e fshatit Gjonaj do të performojnë gjashtë SHKA nga Kosova, një nga Kruma dhe një nga Tetova. E në natën finale, të pranishme do të jenë tri SHKA vendore, nga një nga Struga e Tuzi, si dhe SHKA-ja e mërgimtarëve nga Zvicra “Dardania”.

Organizimi i edicionit të radhës të festivalit është mbështetur nga Komuna e Prizrenit, MKRS-ja dhe sponsorë komercialë.